Bakda Mawi Rampog
anggitanipoen R. Kartawibawa (Bale-Poestaka, Weltevreden 1923)

4. OENTABING TIJANG

DOERMA

 

Mindak sijang tijangipoen brol-ebrolan,

salong noempak pedati,

brandon tijang katah,

moerih majaring wragad;

prijantoen kang saking distrik,

dateng sarengan

sami anoempak béndi.

 

Kang wadana wonten ngadjeng nitih kréta,

kalihan ingkang poetri,

toewin para poetra;

panongsongé hoep oepas

wonten ing bak amor koesir,

lampit pak-lopak,

ambontjèng wonten wingking.

 

Sinamboengan para asistèn wadana,

sami anoempak béndi,

ngoesiri pijambak,

angiwa djoeroe serat,

oepas panongsong ing wingking;

sampoen basahan;

sroetoe kantoen sapalih.

 

Déné para poetri sami noempak dokar;

wingking ingkang njambeti,

pra mantri sadaja,

ladjeng Walandi Tjina,

pra hartawan noempak bendi,

rikat-rikatan,

nglantjangi pra prijaji.

 

Para loerah soemerep ndara wadana,

noetoeti saking wingking,

moedoen kedakalan,

andodok ladjeng njembah;

déné ingkang noempak epir,

prentah mirèkna,

dokaripoen ing pinggir.

 

Toedoengipoen palenton sami binikak,

andekoe nginggil epir,

loemampah lon-lonan,

manawi para ndara;

sampoen kewoentat anoeli,

dokaring loerah,

saweg loemampah malih.

 

Oeroet margi katah tijang sesadéan,

ngrompol ingkang noembasi;

tjao kelarisan,

medja kas sampoen mangkak,

kadékékan gelas tirik,

gelas djinggringan,

kasar alingir-lingir.

 

Sanding emploek wadah djeroek, gendis, klapa,

tjanting koeningan alit,

mawi klinting katah,

koemrintjing saben ébah,

emploek malih wadah goedir,

gelas koem-koeman:

djeram toewin telasih.

 

Toewoen ageng wadah keroekan dawegan;

ing satengening dingklik,

gembrèng wadah toja,

ing kiwa wonten tjagak,

rèmbèl mertjon lombok djemprit,

lan lombok abang,

rénténgan ngiming-iming.

 

Boten tebih dasaran djagoeng bakaran,

doelang toemoempang rindjing,

moendjoeng ketingalan,

isi djagoeng bakaran,

anglo tinépasan ipit,

areng mengangah,

kemrètèk pating pletik.

 

Ngandap asem wonten bango pajon képang;

ngajomi médja alit,

sanding peti tilas:

wadah minoeman keras,

poenika dipoen lèmèki,

ing serat kabar,

Djawikanda waradin.

 

Njai bakoel alinggih wonten gelaran,

sadé ses warni-warni,

sata semproel, koeldan,

lodong wadah bengkekan,

rokok klobot ameméngin,

mateng setlikan,

sarta besoetan goenting.

 

Sampoen sami bentélan aloes arata;

boengkoesan sata Toerki,

toewin kang lintingan,

ing wadah edoes kertas,

dinoeloe ngresepken ati,

djèdjèr akatah,

sanding erèk tjap klenting.

 

Mertjon lombok djemprit mertjon lombok abang,

bengkakan elong alit;

slorokaning dasar,

kinoentji wadah jatra;

kang toembas kénging ngitjipi,

eses lan sata,

mila kelangkoeng laris.

(sebelum, Daftar Isi, sesudah)

Buku aslinya milik: Perpustakaan Balai Bahasa Yogyakarta (BBY) Jalan I Dewa Nyoman Oka 34, Yogyakarta, DIY Surel: info@balaibahasa.org, Situs: http://balaibahasa.org INDONESIA

Senin, 19 Maret 2012: diubah kedalam bentuk elektronis oleh Djoko Luknanto (http://luk.staff.ugm.ac.id) bekerjasama dengan Sus Prihandani & Susam Tri Yuli Haryati - BBY   Diedit bersama dari hasil OCR (optical character recognition) oleh Djoko Luknanto (luknanto@ugm.ac.id), Joko Purbopuspito (jpurbop@yahoo.com), dan Nurida Finahari (nfinahari@yahoo.com) (Pengeditan naskah selesai pada Jumat, 30 Maret 2012)

---

oleh Ir. Djoko Luknanto, M.Sc., Ph.D.

(Djoko Luknanto, Jack la Motta, Luke Skywalker)
(Alamat situs ini: http://luk.staff.ugm.ac.id/bmr/, http://luk.tsipil.ugm.ac.id/bmr/)  

Peneliti Sumberdaya Air
di Laboratorium Hidraulika
Jurusan Teknik Sipil dan Lingkungan, Fakultas Teknik
Universitas Gadjah Mada
Jln. Grafika 2, Yogyakarta 55281, INDONESIA
Tel: +62 (274)-545675, 519788, Fax: +62 (274)-545676, 519788