|
|
2. BADE BAKDAN
Jèn manah raméning bakdan tjara djaman
kina, inggih lajak kémawon manawi laré djaman
alitan koela roemijin kepengin sanget toemoet ningali
bakdan. Taksih kirang sawoelan bakdan waoe sampoen dados
pangadjeng-adjenging laré. Laré nakal poeroen
anteng, jèn dipoen girèn-girèni boten
kaadjak ningali bakda. Sawènèh laré
ndjadjani poeroen njèlèngi arta kanggé
djagi-djagi béndjing bakda, kanggé toembas
rasoekan sapanoenggilanipoen. Saja jèn riadi sampoen
tjepak, pijer dipoen raosi kémawon: "Bakdané
kurang limang dina, akoe wis ditoekokaké klambi
abang.'' Katah ingkang witjanten bingah-bingah makaten:
"Soek embèn bakda! Soek embèn bakda!''
Déné ingkang dèrèng gadah
badé santoen panganggé sami soesah sanget,
koewatos jèn estoe boten saged santoen.
Ing dinten malemipoen bakda, saweg riboet-riboetipoen
tijang sepoeh ngladosi laré-laré lan
réntjang-réntjang. Bodjo neda kateboesaken
sengkangipoen saking pagantosan, anak neda rasoekan,
sindjang, iket. Berah pangèn neda santoen mentering
nem woelanan. Wonten malih ingkang riboet anggènipoen
badé wiloejengan, pitrah lan betah
sanès-sanèsipoen warni-warni. Toekang medel,
toekang mbabar, gredji, kemasan, toekang njepoeh, srempengan
njamboet-damel, mangkring berahanipoen.
Koela sasedèrèk sampoen naté
ngraosaken mèh kasep angsal santoen makaten. Gek
kados poendi, manawi panganggé boten dados sadinten
malem riadi poenika, rak estoe bakdan manganggo loengsed!
Tijang sepoeh koela lan réntjang sepoeh-sepoeh sami
sengkoedan; ing pawon para èstri goemerah nglorod
sogan lan ngerok sindjang ingkang mentas kababar. Bapak
njikroe amesin rasoekan koela sedaja, réntjang sami
mbedahi, dloedjoer-dloedjoer, itik-itik. Koela
laré-laré, sakedap-sakedap noewèni
dados lan dèrèngipoen; dèrèng
mapan-mapan tilem jèn dèrèng ndjadjal
rasoekan ingkang saweg dloedjoeran. Sareng sampoen ndjadjal,
pinanggih boten kaliten, saweg poeroen mapan tilem.
Éndjing djam gangsal sami tangi, teroes adoes
groedjoegan dateng soemoer tanpa mawi kaatag. Bibar adoes
ningali sindjang énggal pating kledèr
soemampir ing gawangan oetawi gèntèr, rasoekan
énggal tjoemantel ing saka namoeng kantoen ngoenoesi
benanging dloedjoeran kémawon. Kados poendi leganing
manah! Laré alit-alit ladjeng dipoen bebedi, pidjer
maoni: "Iki kok ngéné; emoh nèk kaja
ngono; iki singsetna!" Sareng sampoen ladjeng
kedédar-kedèdèr ing latar, dateng
pinggir margi, iming-imingan rasoekan, gelang toewin
kandoetanipoen arta. Makaten waoe sami njangga pintjoek isi
sekoel goerih lan poenar, lawoeh sroendèng,
delé gorèng lan doedoeh ajam. Tijang
laré, badé neda poenapa malih, jèn
éndjing-éndjing sampoen njangga pintjoek!
- PANGKOER
-
- Melek bjar tangi tjekékal
- moelat dilah inglebet Ian ing
djawi;
- radi mbleret oeroebipoen,
- kori kok taksih menga,
- tengah djogan pipihan tegesan
ngoembroek,
- tjangkir nggoling ing
lèpèkan,
- tjèpres endeg-endeg kopi.
-
- Mireng kloeroeking lantjoeran,
- kempoel nang-noeng lamat-lamat
atebih,
- geroting sénggotan
soemoer,
- kesriking njapoe latar,
- wewéntéhan ènget
manawi ing daloe
- ketileman nggèné
nengga:
- bapak anglemboer koelambi.
-
- Sareng ngawasaken saka,
- boten samar djasipoen tjita
nik-nik:
- dados, tjoemantel ing pakoe,
- lega raosing manah,
- ladjeng ngadeg medal dateng latar
goegoep,
- repet-repet dèrèng
padang,
- hawa asrep bangoen
éndjing.
-
- "E, lah ija iki bakda,
- kèri dandan, kabèh wis
pada tangi,
- ora gelem nggoegah akoe."
- Ladjeng adoes groedjoegan,
- gebjar-gebjoer seger anget
tojanipoen,
- sareng mentas saking toja,
- mrinding kesilir ing angin.
-
- Énggal mantoek rerikatan,
- sèlèh saroeng: broek,
santoen sindjang alit,
- aken nata wironipoen,
- njepeng saboek oeloeran,
- endas léjo ingadjeng
tjantolanipoen,
- sila sangadjenging bapa,
- neda dipoen ket-iketi.
-
- Sabab anjobi djingkengan,
- boten dados déning sirah
kelimis,
- oedengé tansah maloeroet,
- sampoené ingoedengan,
- ladjeng ngilo katja boender tanpa
wengkoe,
- toer goroh wah sampoen petjah,
- rasane sampoen belirik.
-
- Nanging sampoen keleresan,
- ladjeng ngepang sarapan sekoel
goerih,
- lawoeh sambel goreng sajoeb,
- sroendèng semara-dana,
.
- sareng padang anganggé
rasoekanipoen;
- mertjonan sangadjeng grija,
- ngandap régol pinggir
margi.
Ing margi sampoen katah tijang langkoeng, ing wantji djam
nem lan pitoe tanpa wonten pedotipoen tijang loemampah,
limrahipoen bajak-bajak bebrajatan, sadaja mangangge bakdan,
dalasan tijang mikoel roempoet inggih rasoekan setrikan.
Kawoeningana, kala samanten dèrèng andjrah
rasoekan djas petak, oegi dèrèng tjara: tijang
goendoelan, kedjawi laré kita. Poendi wonten rasoekan
petak: inggih modin, djongos Walandi lan tijang sabrang.
Adi-adining rasoekan èstri: soep, badénipoen
laken, moher, koelitan. Tijang kita nggegoedjeng
anggèn-anggènipoen tijang doesoen, sipat
djaler mesti iket-iketan, awit malem rijadi sampoen
djingkengan ngetrap oedeng, inggih poenika oedeng-oedengan
matjak gedèn saestoe. Poetjoeking oedeng kapanteng
sarana kadjapit djempol kalihan dridji soekoe, badé
koentjoeng katjakot, ladjeng nata lempitan lan wiron. Tijang
doesoen poenika ketawis kémawon. Sindjang oedengipoen
ratjak latar petak tjap, sogan abrit, iket-iketanipoen
sadjak anggedaboel poenapa ambedoedoeg sanginggiling
koeping, koentjoeng tanpa katekoek, kontjèr
nglèwèr. Bebedanipoen djigrang, wiron
anggedodor. Jèn nganggé rasoekan setrikan
adjrih lémbéan, dados lampahipoen kakon, boten
nolah-noleh: kantja kalih kapoerih ngapit-apit,
witjantenipoen: "Mengko nèk tekan ngaloen-aloen akoe
gotjekana waé, ja!" Wangsoelaning kantjanipoen:
"He-eh!!"
- PANGKOER
-
- Kantja ngredi tebih kita,
- taksih daloe djam tiga sampoen
tangi,
- nedani maésanipoen;
- roempoet sampoen sadija,
- wingi sonten anggènipoen ngarit
njeroek;
- saoer angiras sarapan,
- adandan saanak rabi.
-
- Anakipoen tansah béka:
- "Gagi ta joeng, akoe dandani
disik,"
- gidro-gidro senggroek-senggroek,
- koewatos jèn katilar;
- anak djaler sapihan lema
kekoentjoeng
- ngetapel wonten
nggéndongan,
- jèn dipoen doenaken
nangis.
-
- Poen bijoeng ndjoengkati lawan,
- djedjoengkatan pijambak,
wira-wiri;
- dangoe-dangoe sampoen rampoeng,
- ladjeng sami bidalan;
- kantja djaler ngénggalaken
saking ngloeroeng.
- "Wis, ja, mbok, mangsa bodoa
- neng ngomah sing ngati-ati."
-
- Lampahipoen dedoeloeran,
- Kedap-kedap manawi anglangkoengi,
- grijaning tepanganipoen,
- tjeloek-tjeloek angadjak, ,
- sareng mlampah ngénggalaken
ingkang kantoen,
- bok èstri joemangkah
wijar,
- anak noetoeti angidjig.
-
- Kang soerja sampoen soemoenar,
- ingkang mlampah waoe sami
nglangkoengi,
- margi tegil moedjoer ngidoel,
- ing pinggir katah séla,
- ageng-alit sawènèh
anggampèng manjoel,
- kados papan madjeng
ngétan,
- kakang doesoen angendeli.
-
- Ningali ajang-ajangan,
- ngadjengakan séla sarwi
nggrajahi,
- lantjipaning adoe mantjoeng,
- kapidih kéring kanan,
- inggil sisih, ketingal
wajanganipoen,
- ladjeng dipoen tata papak,
- sarana dipoen doedoeti.
-
- Bedoedoeg nginggil talingan,
- Inkang méntjol ladjeng dipoen
taboki;
- andangak ladjeng andingkloek,
- kados ngilo ing katja;
- sasampoening keleresan ladjeng
moendoer,
- ngadeg ngiringaken séla,
- ngemek mongol, mripat nglirik.
-
- Ajang-ajangan ing séla;
- sampoen boender, namoeng ing sirah
nginggil,
- taksih wonten ingkang moentjoe,
- ingoesap dinoelekan,
- sampoen mlipis boten koetjiwa ing
wangoen,
- kontjer noenten siningsetan,
- ladjeng mangkat mlampah malih.
Laré-laré ingkang sami pamer
panganggé ing wantji éndjing waoe, saweg jam
pitoe kémawon sampoen woeda malih, poepoeranipoen
belang-belang, labet mentas nangis sadangoening dolanan,
oetawi tjèprès tilas neda poenapa-poenapa.
Loerah-loerah doesoen sami malebet kita ngetoetaken
tontonanipoen, darat oetawi nenoempak, rasoekan sikepan,
tjlanan, bebed kawoeng oetawi latar tjemeng, kairingaken
déning pagondal, koeloek taksih kabekta ing
laré kaboentel katjoe abrit, pajoeng kabekta ing
tijang malih; pantes sanget loerah waoe njepeng tjemeti,
senadjan boten noempak kapal; awit ngiras kadamel bektan,
andjagèni kadamel mranata lampahing tijang.
Mila jèn bakda boten mawi karaméan, tijang
ladjeng boten gadah kabraèn dateng panganggé
sataoen sapisan.
|
